Connect with us

आर्थिक

रक्सौल-काठमाडौं रेलमार्ग अध्ययनका लागि नेपालको अनुमति खोज्दै भारत

भारतले नेपालबाट कुनै ढिलाइ नगरी रक्सौल-काठमाडौं रेल लिंकको विस्तृत अध्ययन गर्न अनुमति माग गरेको छ ।

Published

on

Nepal Online Patrika| Kathmandu: भारतले नेपालबाट कुनै ढिलाइ नगरी रक्सौल-काठमाडौं रेल लिंकको विस्तृत अध्ययन गर्न अनुमति माग गरेको छ ।

काठमाडौंस्थित भारतीय दूतावासले नेपाल सरकारलाई पठाएको प्रस्तावले यस रेल लिंकको अध्ययन गर्ने क्रममा कोभिड-१९ का कारण स्वास्थ्य र सुरक्षा प्रोटोकल अनुसरण गर्ने प्रतिबद्धतासमेत गरेको छ । मुम्बईको नभीमा मुख्यालयले भएको भारतको सरकारी कोंकण रेलवे निगमले उक्त परियोजनाको विस्तृत अध्ययन गर्नेछ ।

“हामीले आउन भन्‍नेबित्तिकै भारतीय टोली अध्ययनका लागि नेपाल आउन तयार छ । उनीहरूले अध्ययनका लागि आउँदा चाहिने आवश्यक मेसिनरी र अन्य सामग्रीको विवरण पनि पठाएका छन् । हामीले नेपाल आउने टोलीलाई आफ्नो विवरणसहितको सूची पठाउनसमेत भनेका छौं,” रेल मन्त्रालयका महानिर्देशक बलराम मिश्रले भने ।

“कोभिड-१९ संक्रमणको जोखिम रहेकाले अहिलेको अवस्था अनुकूल छैन । विकराल अवस्थाको बाबजुद पनि भारतीय पक्ष अध्ययन गर्न तयार छ । उनीहरूले हामीलाई अनुरोध गरेको ढाँचामा एक साताभित्र विवरण पठाउँछन्,” मिश्रले थपे ।

प्राप्त विवरणहरू भौतिक पूर्वाधार र यातायात मन्त्रालयमा पठाइने र त्यसपछि यो गृह मन्त्रालय र त्यसपछि कोभिड १९ क्राइसिस म्यानेजमेन्ट कमिटी (सीसीएमसी) मा पठाइएपछि उनीहरुलाई आउने-नआउने भन्‍ने विषयमा अन्तिम निर्णय हुने नेपालतर्फबाट जवाफ पठाइएको छ ।

“हामी कोभिड-१९ को नियन्त्रणका लागि जारी गरिएका निर्देशनहरु पालना गर्न तयार छौं,” मिश्रले भने ।

भारतको तर्फबाट रेलमार्ग सञ्चालनमा छ र रक्सौलको सुख्खा बन्दरगाहसम्म पुगेको छ र भारतले यसलाई नेपालको राजधानी काठमाडौंमा जोड्ने योजना बनाएको छ । यो बाराको जितपुर भएर निजगढको प्रस्तावित दोस्रो अन्तर्राष्ट्रिय विमानस्थलको छेउबाट चल्नेछ ।

रेल लाइनको कुल लम्बाइ १३६ किलोमिटर हुन अपेक्षित छ । जसमध्ये ४२ किलोमिटर सुरुङमार्ग भएर पार हुनेछ। यसको लागत करिब तीन खर्ब नेपाली रुपैयाँ लाग्‍ने अनुमान छ ।

“विस्तृत परियोजना प्रतिवेदन (डीपीआर) गरेपछि अन्तिम लागत थाहा हुनेछ । यो केही प्रतिशतले बढ्न वा घट्न सक्छ । अध्ययन पूरा गर्न कम्तिमा एक वर्ष लाग्‍नेछ,” मिश्रले भने ।

सन् २०१८ मा काठमाडौंमा सम्पन्‍न चौथो बिम्सटेक शिखर सम्मेलनमा नेपाल र भारतले काठमाडौं-रक्सौल रेल लिंकको सम्भाव्यता अध्ययन गर्ने सम्झौतामा हस्ताक्षर गरेका थिए । यस आयोजनाको लगानी मोडेललाई अन्तिम रूप दिइएको छैन ।

Advertisement
Click to comment

Leave a Reply

Your email address will not be published. Required fields are marked *

मुख्य समाचार

Advertisement

Trending